* Ipuin lehiaketa 2009. Deialdia. (09/04/20)

Kima Euskara Taldeak bosgarren urtez jarraian euskaltegietako ikasleei zuzendutako ipuin lehiaketa antolatu du. Iazko berrikuntza maila bakarretik bi mailetara pasatzea izan bazen, aurtengo deialdiak bi berrikuntza ditu. Aurrenekoa, Altsasu, eta Sakanako, euskaltegietako ikasleekin batera Sakanako mintzakide programako partaideek ere parte hartu dezaketela (B eta C mailetan). Bigarren berrikuntza, lehiaketari hirugarren maila bat gehitzea da. C mailan ipuinen audio grabaketak lehiatuko dira eta www.altsasukokima.com web orrian izanen dira entzungai.

Kima Euskara Taldetik euskara ikasten, alfabetatzen edo mintza-praktika taldeetan ari direnei parte hartzera animatu nahi ditugu, maila bakoitzeko sari eder bana eskuratzeko aukera izanen dute eta. A eta B mailetako ipuin onenarendako: 75 euroko txartela Arkatz liburu-dendan gastatzeko. C mailako onenak, berriz, Kimak emandako sari ederra jasoko du.  

Kima Euskara Taldeak euskaltegietako euskara ikasleendako ipuin lehiaketa antolatzean asmo bikoitza du: euskalduntzen ari diren pertsonei ikasitakoa erakusteko bide bat eskaintzea da arrazoietako bat. Hau da, ikasitakoa klasetik kanpo erakutsi dezatela. Ipuin lehiaketa antolatzeko Kima Euskara Taldearen beste arrazoia da euskara ikasteko konpromisoa hartu duten altsasuar, eta sakandar, guztien ahalegina nabarmendu nahi izatea. Ahalegin hori egin duten eta egiten ari diren guztiak zoriondu beharrean gaude.

Lehiaketaren aurreko lau edizioetara 43 ipuin aurkeztu ziren. Horiek guztiak Kima Euskara Taldearen web orrian jasoak daude, baita haietako bederatziren audio grabazioak ere. Haiek irakurtzera eta entzutera gonbidatzen zaituztegu.

Kima Euskara Taldeak antolatu du lehiaketa, Altsasuko Udalaren eta Sakanako Mankomunitatearen laguntzarekin, baita Arkatz liburu-dendaren laguntzaz ere.

Altsasun, 2009ko apirilaren 20an

Kima, Euskara Taldea

www.altsasukokima.com

Laguntzaileak:

Arkartz liburu-denda, Altsasuko Udala eta Sakanako Mankomunitatea

Oharra:

Oinarriak

Lehena

Lehiaketa honetan euskalduntzen ari den Altsasuko, edo Sakanako, edozein pertsonak parte hartu dezake. Baita eremu bereko mintzakide programako parte-hartzaileek ere.

Bigarrena

Hiru maila ditu lehiaketak. A mailan 3. urratsera bitarteko ikasleek parte hartu dezakete. B mailan, aldiz, 4. urratsetik gorako ikasle guztiek. C maila lehiaketara aurkeztutako ipuinen audioendako da. Azken bi maila horietan Mintzakideek parte hartu dezakete.

Hirugarrena

A mailan, banaka edo taldeka, egile bakoitzak nahi beste testu aurkez ditzake. B mailan lanak banakoenak eta, gehienez ere, hirukoteena izanen dira. Jakina, euskaraz idatziak. Lanen luzera norberaren esku dago. C mailan aurreko irizpideak gorde behar dira, baina bakarkako lanen kasuan laguntzaileak onartuko dira.

Laugarrena

Lehiaketa aurrera egiteko gutxienez 10 lan aurkeztu beharko dira. Bestela bertan behera geldituko da.

Bosgarrena

Testuak argitaratu gabeak eta jatorrizkoak izanen dira. Beste edozein lehiaketetan saririk jaso gabea izan behar du ipuinak.

Seigarrena

Irainak, sexismoa, arrazakeria, gorrotoa edo bestelako jarrerak sustatzen dituzten lanak ez dira onartuko, ezta oinarrizko eskubideren kontrako edukirik ere.

Zazpigarrena

Altsasuri buruzko erreferentzia(k) sartzea ezinbestekoa da, paisaiak direla, tokiak direla…

Zortzigarrena

Ipuin bakoitzaren bi kopi idatzi eta beste bat disketean edo cd-an aurkeztuko dira lehiaketara. Azken euskarri horretan narrazioaren grabaketa gehituko da. Espazio bikoitzean mekanografiatua egon beharko du. Ipuina eta disketea edo cd-a gutunazal itxi baten barruan sarturik eta izenorde batekin, euskaltegian aurkeztuko da. Aipatu gutunazalaren barruan beste gutunazal itxi bat sartuko da eta bertan egileak bere datuak eman beharko ditu: izen-abizenak, telefonoa, helbidea eta euskara maila edo urratsa.

Bederatzigarrena

Kima, Altsasuko Euskara Taldeak izendatuko du epaimahaia.

Hamargarrena

Hainbat irizpide finkatu dira saritu beharreko testuak aukeratzeko: originaltasuna, sormena, mailari dagokion euskara. Epaimahaiaren epaia apelaezina izanen da. Lanak maiatzaren 7ra arte aurkeztu daitezke. Sari banaketa maiatzaren 14an eginen da Iortia kultur gunean.

Hamaikagarrena

Aurkeztutako lanak Kima Euskara Taldearen esku geldituko dira. Publikatzeko aukera gordeko du.

Hamabigarrena

A eta B mailan sari eder bana izanen da: Arkatz liburu-dendan 75 euro gastatzeko txartela. C mailako lanik onenak Kimak emandako saria jasoko du.

Hamahirugarrena

Lehiaketan parte hartzeak berarekin oinarriak onartzea dakar.